សម្ដេចក្រឡាហោម ស ខេង អះអាងថា ឆ្នាំនេះអាស៊ាន បានសម្រេចសមិទ្ធផលធំៗ ជាច្រើន បើទោះបី យើងត្រូវឆ្លងកាត់វិបត្តិកូវីដ-១៩ ជាសកលក៏ដោយ។ ថ្លែងសុន្ទរកថាក្នុងការ បើកកិច្ចប្រជុំប្រចាំឆ្នាំ លើកទី៥ នៃបណ្ដាញទីក្រុងឆ្លាតអាស៊ាន (ASCN) តាមប្រព័ន្ធ Video Conference ដោយមានការអញ្ជើញចូលរួមពី គណៈប្រតិភូមកពី បណ្ដាប្រទេសអាស៊ាន អគ្គលេខាធិការដ្ឋានអាស៊ាន និងភ្ញៀវកិត្តិយសជាតិ និងអន្ដរជាតិ ជាច្រើនរូបទៀត នាព្រឹកថ្ងៃទី៣០ ខែសីហា ឆ្នាំ ២០២២។

សម្ដេចក្រឡាហោម ស ខេង ឧបនាយករដ្ឋមន្ដ្រី ក្រសួងមហាផ្ទៃ មានប្រសាសន៍ថា ទោះបីយើងត្រូវឆ្លងកាត់វិបត្តិកូវីដ-១៩ ជាសកលក៏ដោយ ក្នុងឆ្នាំនេះអាស៊ាន បានសម្រេចសមិទ្ធផលធំៗ មួយចំនួន ដូចជា កិច្ចព្រមព្រៀងភាពជា ដៃគូសេដ្ឋកិច្ចគ្រប់ជ្រុងជ្រោយតំបន់ (RCEP) ហើយយើងក៏បានធ្វើការ យ៉ាងស្វិតស្វាញ ក្នុងការបញ្ចប់ក្រមប្រតិបត្តិ នៅសមុទ្រចិនខាងត្បូង (COC) និងនាពេលថ្មីៗនេះ បានរៀបចំកិច្ចប្រជុំរដ្ឋមន្ត្រី ការបរទេសអាស៊ាន លើកទី៥៥ ដោយបានស្វែងរកដំណោះស្រាយ លើបញ្ហាប្រឈមទាំង ផ្នែកភូមិសាស្ត្រនយោបាយ និងបញ្ហាសង្គមសេដ្ឋកិច្ច ដែលកំពុងកើតមាន។ សម្ដេចក្រឡាហោម បន្ថែមថា ស្ថិតនៅក្នុងដំណាក់កាល នៃការរីកចម្រើន និងអភិវឌ្ឍន៍នៃតំបន់អាស៊ាន បញ្ហាប្រឈមផ្សេងៗ បានកើតឡើងជាបន្តបន្ទាប់ រួមមាន បញ្ហាភូមិសាស្ត្រនយោបាយ បញ្ហាសុខភាពសាធារណៈ និងបញ្ហាសង្គម សេដ្ឋកិច្ចផងដែរ។

ក្នុងនាមជាប្រធានអាស៊ានឆ្នាំនេះ កម្ពុជាបានកំណត់មូលបទ «អាស៊ានរួមគ្នាធ្វើ៖ ដោះស្រាយបញ្ហា ប្រឈមទាំងអស់គ្នា» ប្រឹងប្រែងរួមគ្នា ដើម្បីអាចដោះស្រាយ បញ្ហាទាំងនោះបាន ប្រកបដោយប្រសិទ្ធភាព។ ក្នុងនាមព្រះរាជាណាចក្រកម្ពុជា ជាប្រធានប្តូរវេន នៃបណ្តាញទីក្រុងឆ្លាតអាស៊ាន សម្ដេចក្រឡា ហោម ស ខេង បានវាយតម្លៃខ្ពស់ និងថ្លែងអំណរគុណ យ៉ាងជ្រាលជ្រៅចំពោះ កិច្ចខិតខំប្រឹងប្រែង ក្នុងការផ្ដល់នូវការគាំទ្រ និងកិច្ចសហការ ដល់កម្ពុជាពី សំណាក់អគ្គលេខាធិការដ្ឋានអាស៊ាន ដៃគូសន្ទនារបស់អាស៊ាន (External Partner) និងបណ្តាប្រទេសទាំង១០ របស់អាស៊ាន ដែលបានរួមគ្នាក្នុងការ សម្រេចកិច្ច ការក្នុងស្មារតីស្នូល របស់អាស៊ានគឺ «ចក្ខុវិស័យមួយ អត្តសញ្ញណមួយ និងសហគមន៍តែមួយ»។

សូមជម្រាបជូនដែរថា កិច្ចប្រជុំប្រចាំឆ្នាំលើកទី៥ នៃបណ្តាញទីក្រុងឆ្លាតអាស៊ាន ដែលប្រព្រឹត្តទៅនាថ្ងៃនេះ គឺពិតជាមានសារសំខាន់ ដែលឆ្លើយតបនឹងស្មារតីនៃ កិច្ចប្រជុំកំពូលអាស៊ានលើកទី៣៣ ដែលបានប្រព្រឹត្តទៅ កាលពីឆ្នាំ២០១៨ នៅប្រទេសសិង្ហបុរី។ កិច្ចប្រជុំប្រចាំឆ្នាំ នាពេលនេះ នឹងបន្តដំណើរការ ក្រោមអធិបតីភាពរបស់ ឯកឧត្តម ងី ច័ន្ទផល រដ្ឋលេខាធិការក្រសួងមហាផ្ទៃ និងជាតំណាងជាតិរបស់កម្ពុជា (National Representative of Cambodia)៕