ក្រោយមានការប្រកាសជាផ្លូវការដោយ ឯកឧត្តម វ៉ាត់ ចំរើន អគ្គលេខាធិការ គណៈកម្មាធិការជាតិរៀបចំ ការប្រកួតកីឡាអាស៊ីអាគ្នេយ៍ លើកទី៣២ ឆ្នាំ២០២៣ (CAMSOC) លើការប្រើប្រាស់ពាក្យ «គុនខ្មែរ» ជំនួសឲ្យពាក្យ «Muay» សម្រាប់ការប្រកួតកីឡាស៊ីហ្គេម ឆ្នាំ២០២៣ នេះ បានធ្វើឲ្យប្រជាពលរដ្ឋខ្មែរ បានសាទរ និងគាំទ្រយ៉ាងពេញទំហឹង ចំពោះការរក្សាជំហរ ដើម្បីថែរក្សាគោលការណ៍ អត្តសញ្ញាណជាតិ ក្នុងនាមជាម្ចាស់ផ្ទះស៊ីហ្គេម ២០២៣។ ដូចគ្នានេះដែរ កម្ពុជាក៏ទទួលបានការគាំទ្រ និងចូលរួមពីប្រទេសចំនួន ៦ ផ្សេងទៀត ដូចជា ឥណ្ឌូណេស៊ី, វៀតណាម, ហ៊្វីលីពីន, ឡាវ, មីយ៉ាន់ម៉ា និងម៉ាឡេស៊ី ក្នុងការមកប្រកួតកីឡា ប្រភេទគុនខ្មែរ នេះផងដែរ។

តែយ៉ាងណាមិញ ជុំវិញបញ្ហាផ្លាស់ប្ដូឈ្មោះពីពាក្យ «Muay» មកជា «គុនខ្មែរ» នេះ ក៏បានធ្វើឲ្យមាន ការមិនពេញចិត្ដពី សហព័ន្ធកីឡាថៃផងដែរ។ ដោយ ឯកឧត្តម វ៉ាត់ ចំរើន អគ្គលេខាធិការ គណៈកម្មាធិការជាតិ CAMSOC មានប្រសាសន៍ថា ក្នុងនាមជាម្ចាស់ផ្ទះស៊ីហ្គេម ២០២៣ គឺកម្ពុជាមានក្តីសោមនស្សរីករាយ ចំពោះការផ្លាស់ប្តូរ ឈ្មោះប្រដាល់គុនខ្មែរនេះ ក៏ដូចជាអាចបង្ហាញភាពជា ម្ចាស់ក្បាច់បុរាណគុនខ្មែរ និងជាប្រភេទកីឡាជាអត្ដសញ្ញាណជាតិ របស់កម្ពុជាផងដែរ។ ដូច្នេះកម្ពុជានៅតែ ប្រកាសជំហរដ៏រឹងមាំនេះ ដើម្បីស្របតាមក្តីប្រាថ្នា ដ៏ធំរបស់ប្រជាពលរដ្ឋខ្មែរទូទាំងប្រទេស ហើយចំពោះរឿងមិនពេញចិត្ត និងការមិនចូលរួមរបស់សមាជិកថៃ លើវិញ្ញាសានេះក្តី ក៏ដំណើរដើរឆ្ពោះទៅមុខ នៃការប្រើប្រាស់ «គុនខ្មែរ» ដោយលុបចោលពាក្យ Muay នៅតែដំណើរការដោយរលូន។

គួរបញ្ជាក់ថា កម្ពុជាបានរៀបចំ ការប្រកួតកីឡា ប្រដាល់គុនខ្មែរ ជ្រើសរើសជើងឯកអាស៊ីអាគ្នេយ៍ កាលពីចុងឆ្នាំ ២០២២ កន្លងទៅ ក្នុងពិធីបុណ្យសមុទ្រ នៅខេត្តព្រះសីហនុ ដោយទទួលបានការគាំទ្រ ពីបណ្តាប្រទេសមួយចំនួន ក្នុងអាស៊ីអាគ្នេយ៍។ ជាមួយគ្នានោះ សហព័ន្ធប្រដាល់គុនខ្មែរជាតិ និងអន្តរជាតិ បានរៀបចំវគ្គបណ្តុះបណ្តាល មន្ត្រីបច្ចេកទេស អាជ្ញាកណ្តាលចៅក្រម ដើម្បីបង្កើនសមត្ថភាព ត្រៀមដឹកនាំការប្រកួត និងកាត់សេចក្តី ប្រដាល់គុនខ្មែរ ក្នុងពេលប្រកួតស៊ីហ្គេម នាខែឧសភា ឆ្នាំ២០២៣ ឱ្យមានភាពយុត្តិធម៌ និងជោគជ័យផងដែរ៕