យោងតាមរបាយការណ៍ចេញផ្សាយ ដោយក្រសួងទេសចរណ៍ កាលពីថ្មីៗនេះ បានឲ្យដឹងថា ក្នុងរយៈពេល ៤ ថ្ងៃ នៃពិធីបុណ្យចូលឆ្នាំចិន គិតចាប់ពីថ្ងៃទី ២១-២៤ ខែមករា ២០២៣ កន្លងទៅនេះ ភ្ញៀវទេសចរ បានចេញដើរលេងកម្សាន្ត នៅទូទាំងប្រទេសកម្ពុជា សរុបចំនួនប្រមាណ ១ ០៤៩ ២២២នាក់ ដោយក្នុងនោះ មានភ្ញៀវជាតិ ១ ០០៧ ១៦៦នាក់ និងភ្ញៀវបរទេស ៤២ ០៥៦នាក់។ ចំណែកឯគោលដៅទេសចរណ៍សំខាន់ៗរ យៈពេល៤ថ្ងៃនេះ រួមមានដូចជា៖ ខេត្តព្រះសីហនុ ២៩៦ ០២៨នាក់, ខេត្តសៀមរាប ១០៥ ៤៨១នាក់, ខេត្តបាត់ដំបង ១០២ ៧៧៨នាក់, ខេត្តកំពត ៨២ ១៩៩នាក់, ខេត្តប៉ៃលិន ៨១ ៥០០នាក់, ខេត្តកំពង់ចាម ៦៧ ៩១៤នាក់, ខេត្តកែប ៦៧ ០៣០នាក់។

ក្រសួងទេសចរណ៍ ក៏បានគូសបញ្ជាក់ផងដែរថា ការដែរចំនួនភ្ញៀវទេសចរ ចេញដើលេងកម្សាន្ដ ក្នុងចំនួនដ៏ច្រើនបែបនេះ គឺដោយសារចូលឆ្នាំចិន ក្នុងឆ្នាំនេះ ត្រូវនឹងថ្ងៃសម្រាកចុងសប្តាហ៍ ដូច្នេះយើងសង្កេតឃើញថា ចរន្តភ្ញៀវទេសចរ និងការធ្វើដំណើរកម្សាន្ត របស់ប្រជាពលរដ្ឋ ទៅកាន់គោលដៅទេសចរណ៍នានា មានសភាពផុសផុលច្រើន ខណៈដែលប្រជាពលរដ្ឋមួយចំនួន បានចាប់ផ្តើមធ្វើដំណើរ ទៅស្រុកកំណើត តាំងពីល្ងាចថ្ងៃសុក្រ ដើម្បីរៀបចំសែន តាមប្រពៃណីចិន។ បន្ថែមពីនេះ គោលដៅទេសចរណ៍ទូទាំង ប្រទេសសុទ្ធតែទទួលបាន ចំនួនភ្ញៀវទេសចរកកកុញ ខណៈប្រជាពលរដ្ឋភាគច្រើន ដើរកម្សាន្តជាលក្ខណៈក្រុមគ្រួសារ ហើយខ្លះទៀត ដើរកម្សាន្តច្រើនគោលដៅ។

ដោយឡែក សម្រាប់ខេត្តព្រះសីហនុ ភ្ញៀវទេសចរភាគច្រើន ទៅព្រឹកមកវិញល្ងាច ជាមួយការធ្វើដំណើរតាមផ្លូវល្បឿនលឿន។ ខណៈដែរប្រជាជនមួយចំនួនទៀត បានត្រឡប់ចូលរាជធានីភ្នំពេញវិញ កាលពីថ្ងៃចន្ទ ហើយខ្លះទៀតបានត្រលប់ ចូលវិញនាល្ងាចម្សិលម៉ិញ ខណៈដែលអាជីវករ នៅតាមផ្សារ និងលក់ដូរនៅតាមផ្ទះបានបិទតូប និងហាងជាបណ្តោះអាសន្ន ក្នុងរយៈពេលចូលឆ្នាំនេះ ដើម្បីជួបជុំគ្រួសារ និងដើរកម្សាន្ត ស្របពេលអង្គភាព និងស្ថាប័នមួយចំនួន បានអនុញ្ញាតឱ្យបុគ្គលិក ឈប់សម្រាក ដោយដាក់ជាកម្មវិធី ប្រជុំបូកសរុបប្រចាំឆ្នាំជាដើម។