ភ្នំពេញ៖ ប្រទេសចិន វៀតណាម និងថៃ បាននាំចូលទំនិញ មានតម្លៃជាង ១១,៥ ពាន់លានដុល្លារមកកាន់កម្ពុជា ដែលស្មើនឹង ៧០,៨% នៃការនាំចូលសរុប របស់ប្រទេសចំនួន ១៦,៣ ពាន់លានដុល្លារ ក្នុងរយៈពេលប្រាំបីខែដំបូងនៃឆ្នាំ ២០២៣ នេះបើយោងតាម អគ្គនាយកដ្ឋានគយ និងរដ្ឋាករ។

ជាក់ស្តែង ប្រទេសចិនបានឈរ នៅលើកំពូលតារាងជាមួយនឹង ការនាំចេញក្នុងទំហំទឹប្រាក់ប្រមាណ ៧,២ ពាន់លានដុល្លារ មកកម្ពុជា ឬស្មើ ៤៣,៩% នៃការដឹកជញ្ជូនសរុប ធ្លាក់ចុះ ០,៦% ធៀបនឹងឆ្នាំមុន។ ដោយឡែក ការនាំចូលពីប្រទេសវៀតណាម បានធ្លាក់ចុះ ១១,៧% មកត្រឹម ២,៥ ពាន់លានដុល្លារស្មើនឹង ១៥% នៃការនាំចូលសរុប ចំណែកការនាំចេញពីប្រទេសថៃ បានធ្លាក់ចុះ ២៥,៨% មកនៅត្រឹម ១,៩ ពាន់លានដុល្លារ ឬស្មើ ១១,៩% នៃការនាំចូលសរុប។

គួរឲ្យដឹងដែរថា ក្នុងអំឡុងពេលនេះ កម្ពុជាបានកាត់បន្ថយ ការចំណាយលើការនាំចូលចំនួន ២៥,២% ដោយអគ្គនាយកដ្ឋានគយ និងរដ្ឋាករបាននិយាយថា កម្ពុជាក៏បាននាំចូល ផលិតផលពីប្រទេសសិង្ហបុរី ឥណ្ឌូនេស៊ី ជប៉ុន តៃវ៉ាន់ ម៉ាឡេស៊ី និងសាធារណរដ្ឋកូរ៉េផងដែរ។

អនុប្រធានសភាពាណិជ្ជកម្មកម្ពុជា លោក លឹម ហេង បានលើកឡើងថា ការនាំចូលពីប្រទេសចិន វៀតណាម និងថៃ បំពេញតម្រូវការស្ទើតែទាំងអស់ របស់កម្ពុជា ចាប់ពីអាហារ និងរបស់ប្រើប្រាស់ប្រចាំថ្ងៃ រហូតដល់គ្រឿងអេឡិចត្រូនិច និងគ្រឿងចក្រធំៗ។ ទោះជាយ៉ាងណាក៏ដោយ កម្ពុជាក៏នាំចេញទំនិញជាច្រើន ទៅកាន់ប្រទេសទាំងនោះ ផងដែរ។

គូសសម្គាល់ដែរថា ក្នុងរយៈពេលប្រាំបីខែដំបូងនៃឆ្នាំ ២០២៣ អគ្គនាយកដ្ឋានគយ និងរដ្ឋាករបានបង្ហាញថា កម្ពុជាបាននាំចេញទំនិញមានតម្លៃ ៣,៤ ពាន់លានដុល្លារទៅប្រទេសចិន វៀតណាម និងថៃ ដែលស្មើនឹង ២១,៩% នៃតម្លៃនាំចេញសរុបចំនួន ១៥,៧ ពាន់លានដុល្លារ។