ភ្នំពេញ៖ បើយោងតាមរបាយការណ៍ច្បាស់ការ ដែលបានចេញផ្សាយ កាលពីថ្ងៃ ១៦ កុម្ភៈកន្លងទៅនេះ បានឲ្យដឹងថា កម្ពុជារកចំណូលបានពី ពន្ធគ្រប់ប្រភេទក្នុងឆ្នាំ ២០២៣ ចំនួន ៥,៩ ពាន់លានដុល្លារ គឺជាចំនួនធ្លាក់ចុះ ៣,៩% បើធៀបនឹង ៦,១៤ ពាន់លានដុល្លារក្នុងឆ្នាំ ២០២២ កន្លងទៅ។

គួរឲ្យដឹងដែរថា កម្ពុជា មានស្ថាប័នចំនួនពីរ ដែលទទួលខុសត្រូវក្នុងការប្រមូលពន្ធ។ ទីមួយគឺអគ្គនាយកដ្ឋានពន្ធដារ (GDT) ដែលផ្តោតលើការយកពន្ធក្នុងស្រុក រួមទាំងពន្ធលើប្រាក់ចំណូល ពន្ធលើប្រាក់បៀវត្សរ៍ ពន្ធលើតម្លៃបន្ថែម និងពន្ធអចលនទ្រព្យ ចំណែកមួយទៀតគឺ អគ្គនាយកដ្ឋានគយ និងរដ្ឋាករ (GDCE) ផ្តោតលើ ពន្ធអន្តរជាតិ ដូចជាពន្ធលើទំនិញនាំចូល និងនាំចេញ ជាដើម។

ជាក់ស្តែង ក្នុងរបាយការណ៍ដដែល ក៏បានបង្ហាញផងថា GDT រកបាន ៣,៦១ ពាន់លានដុល្លារក្នុងឆ្នាំ ២០២៣ កើនឡើង ៤,៥% ពី ៣,៤៥ ពាន់លានដុល្លារក្នុងឆ្នាំ ២០២២។ ពន្ធដែលប្រមូលបាន ៣,៦១ ពាន់លានដុល្លារនេះ ធានាបានឱ្យស្ថាប័ននេះសម្រេចបាន ១០១% នៃគោលដៅប្រចាំឆ្នាំរបស់ខ្លួន។

ដោយឡែក ជាមួយគ្នានេះ GDCE ប្រមូលពន្ធបាន ២,២៨ ពាន់លានដុល្លារក្នុងឆ្នាំ ២០២៣ សម្រេចបានត្រឹម ៨២,៤% នៃគោលដៅប្រចាំឆ្នាំរបស់ខ្លួន ដែលជាការថយចុះ ១៥,៧% ធៀបនឹងតួលេខឆ្នាំ ២០២២ ដែលបានចំនួន ២,៦៧ ពាន់លានដុល្លារ។

អគ្គនាយក GDCE ឯកឧត្តម គុណ ញឹម មានប្រសាសន៍ថា កត្តាថយចុះនេះ គឺបណ្តាលមកពីបញ្ហាប្រឈមមួយចំនួន រួមទាំងការធ្លាក់ចុះនៃ ការនាំចូលរថយន្ត។ ឯកឧត្តម គុណ ញឹម បានចាត់ទុកថា ការកាត់បន្ថយពន្ធ ដោយសារតែការអនុវត្ត កិច្ចព្រមព្រៀងពាណិជ្ជកម្មសេរីក្នុងអាស៊ាន និងកំណើននៃផលិតកម្មក្នុងស្រុក ដែលនាំឱ្យការនាំចូលធ្លាក់ចុះ។ មិនតែប៉ុណ្ណោះ ក៏មានក្រុមហ៊ុនមួយចំនួន បានប្រើប្រាស់ល្បិចឆ្លាតវៃ ក្នុងការគេចវេសការបង់ពន្ធ។

ជាមួយលទ្ធផលដែលទទួលបាន កាលពីឆ្នាំទៅនេះ ឯកឧត្តម អូន ព័ន្ធមុនីរ័ត្ន ឧបនាយករដ្ឋមន្ត្រី និងជារដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ បានសាទរចំពោះកិច្ចខិតខំប្រឹងប្រែង របស់មន្ត្រីពន្ធដារ ក្នុងការប្រឈមមុខនឹង កាលៈទេសៈប្រឈមនានាកន្លងមកផងដែរ។

ឯកឧត្តម បានថ្លែងថា៖ “យើងបានប្រឈមមុខនឹង បញ្ហាប្រឈមជាច្រើន រួមទាំងការធ្លាក់ចុះ នៃសេដ្ឋកិច្ចពិភពលោក សង្គ្រាមអូសបន្លាយ ភាពតានតឹង ភូមិសាស្ត្រនយោបាយ ដែលបានរំខានដល់ ការដឹកជញ្ជូន និងខ្សែសង្វាក់ផ្គត់ផ្គង់ ក៏ដូចជាការធ្លាក់ចុះ នៃតម្រូវការអ្នកប្រើប្រាស់ជាដើម។”