ខ្យល់ព្យុះធំៗនាពេលបច្ចុប្បន្នមានឥទ្ធិពលខ្លាំងក្លារួចទៅហើយ ដោយពីមួយឆ្នាំទៅមួយឆ្នាំបានសម្លាប់អាយុជីវិតមនុស្សអស់មិនតិចនោះទេ។ ជាក់ស្ដែងខ្យល់ព្យុះ Rai នៅប្រទេសហ្វីលីពីន កាលពេលសប្ដាហ៍កន្លងទៅនេះ បានសម្លាប់អាយុជីវិតពលរដ្ឋហ្វីលីពីនជាង ៣០០ នាក់ និងបំផ្លិញបំផ្លាញទ្រព្យសម្បត្តឯកជន ទ្រព្យសម្បតិ្តសាធារណៈ និងធនធានធម្មជាតិជាច្រើន ហើយឥទ្ធិពលនេះអាចនឹងកើនឡើងទ្វេរដង នេះបើយោងតាមការស្រាវជ្រាវរបស់មហាវិទ្យាល័យហុងកុង។

ការសិក្សាស្រាវជ្រាវថ្មីមួយ ដែលបានចុះផ្សាយដោយមហាវិទ្យាល័យហុងកុង បានបង្ហាញឱ្យដឹងថា ឥទ្ធិពលខ្យល់ព្យុះនាពេលបច្ចុប្បន្ន អាចនឹងឥទ្ធិពលកាន់តែខ្លាំង ឬទ្វេរដង នាឆ្នាំ២១០០ ខាងមុខ ប្រសិនបើពិភពលោក នៅតែបន្តរងគ្រោះ ឬរងការបំផ្លិចបំផ្លាញដោយសារតែស្នាដៃមនុស្សលោក។ ការចុះផ្សាយនោះបានធ្វើឡើង ក្រោមកិច្ចសហការណ៍រវាងក្រុមអ្នកស្រាវជ្រាវអាកាសធាតុ ដែលអង្កេត និងតាមដានបម្រែបម្រួលអាកាសធាតុផែនដី នៅទីក្រុងស៊ិនជិន (Shenzhen) ប្រទេសចិន។

តាមការស្រាវជ្រាវ បានឈានដល់ការព្យាករណ៍ថា ជាទូទៅខ្យល់គួចអាចនឹងមានរយៈពេល ៥ ម៉ោង ឬកើនឡើង ៥៦% បើធៀបទៅនឹងខ្យល់គួចនាពេលបច្ចុប្បន្ន ជាមួនឹងល្បឿនបម្លាស់ទីកើនឡើង ៥០%។ ជាមួយគ្នានោះដែរ ការតាមដាន ដោយយោងទៅលើទិន្នន័យនៃឥទ្ធិពលខ្យល់ព្យុះកើតមានឡើងចន្លោះឆ្នាំ ១៩៧៩ រហូតដល់ឆ្នាំ ២០១៦ កន្លងទៅបង្ហាញថា ឥទ្ធិពលព្យុះទាំងនោះមានឥទ្ធិពលកើនឡើងចន្លោះពី ២ ម៉ោងរហូតដល់ទៅ ៩ ម៉ោង និងកំណើនល្បឿនពី ៣០ ទៅ ១៩០ គីឡូម៉ែត្រក្នុងមួយម៉ោង។

លោក Francis Tam Chi-Yung សាស្ត្រាចារ្យនៃមហាវិទ្យាល័យហុងកុង ជំនាញខាងផែនដីវិទ្យាបានបញ្ជាក់ថា បញ្ហាកើនឡើងកម្ដៅរបស់ផែនដី អាចនឹងបន្តទៅមុខ ដែលនឹងជះឥទ្ធិពលដ៏អាក្រក់ទៅដល់ជីវិតនៅលើផែនដី ដោយខ្យល់គួច ខ្យល់ព្យុះ ការបាក់ដី នឹងកើតមានឡើងញឹកញ៉ាប់ ពិសេសនៅតាមតំបន់វាលទំនាប។ តំបន់ ដែលនឹងរងគ្រោះធ្ងន់ធ្ងរជាងគេ ត្រូវបានវាយតម្លៃថា នៅអាស៊ី ដែលនឹងរងផលប៉ះពាល់ធ្ងន់ធ្ងរជាងបណ្ដាតំបន់ ឬទ្វីបផ្សេងៗ ដោយតំបន់ងាយនឹងរងគ្រោះគឺវៀតណាម សមុទ្រចិនខាងត្បូង បន្តទៅដល់ហុងកុង។

ការកើនឡើងឥទ្ធិពលទ្វេរដងនេះ នឹងបំផ្លិចបំផ្លាញធនធាន អាយុជីវិតជាច្រើន ដែលពីបាកនឹងធ្វើការដោះស្រាយ និងភាសខ្លួន ថែមទាំងអាចកើតមានឡើងជាញឹកញាប់ថែមទៀតផង។ ការសិក្សាស្រាវជ្រាវរបស់មហាវិទ្យាល័យហុងកុង សហការណ៍ជាមួយនឹងភ្នាក់ងារអាកាសធាតុរបស់ចិន នេះធ្វើឡើងដោយពឹងផ្អែក និងយោងទៅលើសេណារីយ៉ូ នៃបម្រែបម្រួលអាកាសធាតុនាពេលអតីតកាល រហូតមកដល់ពេលបច្ចុប្បន្ន ក៏ដូចជាព័ត៌មានជាច្រើនផ្សេងៗទៀតដែលប្រមូលបាន៕