ប្រទេសចិនកំពុងសម្លឹងមើលការផ្លាស់ប្តូរកំពង់ផែ Piraeus របស់ប្រទេសក្រិកទៅជាកំពង់ផែធំបំផុតនៅអឺរ៉ុបដែលធ្វើឱ្យវាក្លាយជាមជ្ឈមណ្ឌលឆ្លងកាត់ដ៏សំខាន់បំផុតសម្រាប់ពាណិជ្ជកម្មរវាងអាស៊ីនិងអឺរ៉ុប។ នៅឆ្នាំ 2016 ក្រុមហ៊ុនដឹកទំនិញរបស់ចិន Cosco បានទិញភាគហ៊ុនភាគរយច្រើននៅក្នុងកំពង់ផែ Piraeus ។ ស្ថិតនៅក្នុងឈូងសមុទ្រ Saronic Gulf ដែលជាកំពង់ផែធំបំផុតរបស់ក្រិកនិងធំជាងគេទី 7 របស់អឺរ៉ុបស្ថិតនៅទីតាំងយុទ្ធសាស្ត្ររវាងទ្វីបអាស៊ីនិងអឺរ៉ុប។ ប្រធានាធិបតីចិនលោក Xi Jinping និងនាយករដ្ឋមន្រ្តីក្រិក លោក Kyriakos Mitsotakis បានប្រកាសនៅដើមសប្តាហ៍នេះថាក្រុមហ៊ុន Cosco នឹងវិនិយោគទឹកប្រាក់ប្រមាណ 600 លានអឺរ៉ូ (660 លានដុល្លារ) ដើម្បីអភិវឌ្ឍ Piraeus ។

លោក Kostas Fragogiannis អនុរដ្ឋមន្រ្តីក្រសួងការបរទេសក្រិកបានប្រាប់សារព័ត៌មានល្បី CNBC កាលពីថ្ងៃពុធថា“ គោលបំណងគឺដើម្បីប្រែក្លាយវាទៅជាមជ្ឈមណ្ឌលឆ្លងកាត់ដ៏ធំបំផុតរវាងអឺរ៉ុបនិងអាស៊ី និងជាកំពង់ផែធំបំផុតនៅអឺរ៉ុប”។ កំពង់ផែ Rotterdam ក្នុងប្រទេសហូឡង់ គឺជាកំពង់ផែធំបំផុតរបស់អឺរ៉ុប។ យើងអាចមើលឃើញកុងតឺន័រចំនួន 8,6 ពាន់លានកុងតឺន័រ (ចូលនិងចេញតាមសមុទ្រ) ក្នុងឆ្នាំ 2018 ពោលគឺមានការកើនឡើងច្រើន។

លោក Fragogiannis បានប្រាប់សារព័ត៌មាន CNBC ថា“ គុណសម្បត្តិភូមិសាស្ត្ររបស់កំពង់ផែក្រិកអាចត្រូវបានប្រើប្រាស់សម្រាប់ការសម្របសម្រួលនិងបង្កើនលំហូរផ្ទេរពីចិននិងចុងបូព៌ាទៅសហភាពអឺរ៉ុបតំបន់បាល់កង់ និងសមុទ្រខ្មៅ ដោយការឆ្លងទៅវិញទៅមក” ។ ចាប់តាំងពីមានវិបត្តិសេដ្ឋកិច្ចក្រិកទីក្រុងប៉េកាំងនិងក្រុងអាថែនបានពង្រឹងទំនាក់ទំនងរបស់ពួកគេឱ្យកាន់តែស៊ីជម្រៅ។ ប្រទេសក្រិកបានប្រកាសកាលពីខែសីហាឆ្នាំមុនថាខ្លួនបានចូលរួមជាផ្លូវការនូវគំនិតផ្តួចផ្តើមខ្សែក្រវ៉ាត់និងផ្លូវរបស់ប្រទេសចិនដែលជាផែនការវិនិយោគប្រកបដោយមហិច្ឆតារបស់លោកស៊ីដែលភ្ជាប់តំបន់អាស៊ីអាហ្វ្រិកនិងអឺរ៉ុប។ 

ក្នុងដំណើរទស្សនកិច្ចទៅកាន់ទីក្រុងអាតែនកាលពីដើមសប្តាហ៍នេះលោក Xi Jinping បានមានប្រសាសន៍ថា“ យើងចង់ពង្រឹងតួនាទីនៃការផ្លាស់ប្តូររបស់ Piraeus និងជំរុញបន្ថែមទៀតនូវសមត្ថភាពនៃការភ្ជាប់បណ្តាញផ្លូវទឹកសមុទ្រយ៉ាងលឿនរបស់ចិនជាមួយអឺរ៉ុប” ។ ប្រទេសចិនបានធ្វើការវិនិយោគផ្សេងៗគ្នានៅក្នុងប្រទេសក្រិករួមមានវិស័យថាមពលនិងទីផ្សារអចលនទ្រព្យ។

លោក Athanasia Kokkinogeni អ្នកវិភាគជាន់ខ្ពស់អឺរ៉ុបនៅ Ducker Frontier បានប្រាប់ CNBC តាមរយៈអ៊ីម៉ែលថា "ជាមួយនឹងដំណើរទស្សនកិច្ចរបស់លោកនៅទីក្រុង Athens ប្រធានាធិបតីចិនលោក ស៊ីជីនពីង បានបញ្ជាក់ជាថ្មីពីការប្តេជ្ញាចិត្តរបស់លោកចំពោះការវិនិយោគហេដ្ឋារចនាសម្ព័ន្ធយុទ្ធសាស្ត្រនៅក្នុងប្រទេសក្រិកដែលជាផ្នែកមួយនៃគំនិតផ្តួចផ្តើមនៃការសហការកាន់តែស្អិតរមួត។ ការវិនិយោគរបស់ចិនបានកើនឡើងយ៉ាងឆាប់រហ័សដោយគាំទ្រដល់វិស័យថាមពលទូរគមនាគមន៍ និងវិស័យអចលនទ្រព្យ។ ក្រុមហ៊ុនលោកខាងលិចគួរតែមានគម្រោងសម្រាប់ការប្រកួតប្រជែងរបស់ចិននៅអឺរ៉ុបក្នុងឆ្នាំ 2020 នៅក្នុងឧស្សាហកម្មភាគច្រើន»។ 

Fragogiannis របស់ប្រទេសក្រិកក៏បានប្រាប់ CNBC ផងដែរថាប្រទេសក្រិកនិងប្រទេសចិនអាចប្រកាសអំពីកិច្ចព្រមព្រៀងវិនិយោគបន្ថែមទៀត។ លោកបានបន្ថែមថា “ផ្នែកទាំងពីរគួរតែពិនិត្យមើលទស្សនវិស័យវិនិយោគសម្រាប់ក្រុមហ៊ុនចិនក្នុងការអភិវឌ្ឍកំពង់ផែប្រតិបត្តិការ និងការដឹកជញ្ជូនរួមគ្នានៅក្នុងប្រទេសក្រិក” ។ ប្រទេសចិនគឺជាប្រភពនៃការនាំចូលធំបំផុតរបស់សហភាពអឺរ៉ុប និងជាទីផ្សារនាំចេញធំជាងគេទី 2 របស់ខ្លួន។ យោងតាមគណៈកម្មការអឺរ៉ុបបានឱ្យដឹងថាប្រទេសចិន និងអឺរ៉ុបធ្វើពាណិជ្ជកម្មជាមធ្យមជាង 1 ពាន់លានអឺរ៉ូក្នុងមួយថ្ងៃ។